Minaliit ang Bisaya

SAPOL Ni Jarius Bondoc, Pilipino Star Ngayon, Friday, January 4, 2008

GALIT si Sen. Aquilino Pimentel sa eksena sa pelikulang “Sakal, Sakali, Saklolo” na para sa kanya’y nagmamaliit sa mga Bisaya. Sa film sinasabon ng amo ang yaya dahil tinuturuang mag-Bisaya ang bata imbis na Tagalog na umano’y Pinoy. Sagot ng mga gumawa ng pelikula, ipina­kikita nga nila ang makitid na pananaw nang maraming puristang Tagalista na ang wikang Filipino ay Tagalog lang at hindi Bisaya o iba pang mga wika sa Pilipinas. Mali ngang ituring ang Filipino na puro Tagalog at walang halaw mula sa ibang kultura. Pero marami pa ring nasaktan na Bisaya, giit ni Pimentel.

Sobra lang kayang sensitibo sina Pimentel? Mainis din kaya sila sa kuwentong ito?

Nagre-recruit daw si Bill Gates ng papalit sa kanya na chairman ng Microsoft. Limang libong aplikante ang dumating. Isa sa kanila si Mario Depakakibo. Inanunsiyo ni Gates na lahat ng hindi marunong mag-Java ay maaari nang umuwi. Dalawang libo ang umalis. Ani Mario sa sarili, “hindi nga ako marunong mag-Java, pero wala namang mawawala kung manatili ako dito, kaya bahala na.” Inanunsiyo naman ni Gates na lahat ng walang karanasan sa pagma-manage ay maaari na ring umuwi, at 2,000 pa muli ang umalis. Naisip uli ni Mario na wala nga siyang management experience, pero wala naman mawawala kung mag-stay pa siya, kaya hala bira. Sinabi naman ni Gates na lahat ng walang PhD ay umalis na; 500 ang luma­ bas. Isip muli si Mario: “High school nga lang ako, pero walang mawawala kung manatili ako, kaya sige.” Sina­ bihan ni Gates ang mga natitirang aplikante na lahat ng hindi marunong magsalita ng katutubong Ainu sa Japan ay umalis na; 498 ang nagsilisan. Sabi na naman ni Mario sa sarili, “Ngayon ko lang narinig ‘yang wikang Ainu, pero ano’ng mawawala kung makipag-matigasan ako?” Napan­sin niya na bukod sa kanya ay iisa na lang ang aplikante. Lahat nu’ng iba’y umalis na. Nilapitan sila ni Gates na nagsa­bing, “Aba’y dalawa lang pala kayo na marunong mag-Ainu, kaya sige nga, mag-usap nga kayo sa wikang ‘yan.” Dahan-dahang lumingon si Mario sa kasamang aplikante at nagtanong: “Unsa ma na, dong?” Sagot nu’ng isa, “Ambot, bay.”

Taga-Negros ang umakda ng kuwentong ‘yan, kaya bida ang Bisaya!