Posisyong publiko inaaring pribado

SAPOL Ni Jarius Bondoc, Pilipino Star Ngayon, Monday, January 7, 2008

GINAGAWA nilang pribadong pag-aari ang posisyon sa gobyerno. ‘Yan ang banat ng mga kritiko sa balak ni Joseph Estrada na tumakbo muling Presidente sa 2010. Inanunsiyo ni Rep. Rufus Rodriguez, spokesman ni Erap, ang pagkandidato muli si Erap. Sa pagkapanalo, kalahati lang daw ng termino ang iuupo. Nais lang malasap sa wakas ni Erap ang tatlong taon sa termino na naudlot ng EDSA-2. Tapos ibabalato niya ang kalahati ng termino sa kapartidong Bise Presidente. Lalakas umano ang tsansa nitong manalo ng sariling six-year term bilang Presidente. Sa huli, 12 taon mananaig ang kasalukuyang watak-watak na Oposisyon.

Hindi gan’un kadali ang plano. Unang-una, bawal sa Konstitusyon, sa Article VII, Section 4, na ma-reelect ang isang Presidente. Pero hindi ito iniinda ni Rodriguez, na dating law school dean. Aniya “reelection” ang usapin. Ang reelection daw ay para sa mga nakaupo na kakandidato para sa parehong posisyon. Hindi raw maituturing na reelection ang kay Erap. Kasi naputol ang tenure niya nu’ng 2001 at hindi naman nakaupo ngayon.

Makitid ang pananaw na ‘yon. Dapat sana ay sagutin ni Rodriguez ang paratang na inaari ni Erap na personal ang pampublikong posisyon ng Presidente, at iniisip pang ibalato ito sa katoto.

Iwinawasiwas ni Rodriguez ang naging karanasan ni Gloria Arroyo. Minana nito nu’ng 2001-2004 ang kalahati ng termino ng pinabagsak na Erap. Tapos, habang nakapuwesto, tumakbo para sa six-year term ng 2004-2010. Susunurin lang daw ni Erap ang kaganapan.

Pilit ang pananaw na ito. Naupo si Arroyo nu’ng 2001 dahil ayon sa Konstitusyon, Art. VII, Sec. 8, hahalili ang Bise kapag namatay, nabalda, nagbitiw o pinatalsik ang Presidente. Ayon naman sa Sec. 4, kapag mahigit apat na taon ang iniupo ng humaliling Presidente, bawal na ito tumakbo. Iba ito kay Erap, na nanalo na pero pinatalsik dahil sa pangungulimbat.

May pakay ang Konstitusyon sa pagbawal ng reelection ng Pangulo. Sapat na ang anim na taon para sa sinoman, at magagamit sa pandaraya ang poder niya kung tatakbong muli. Masdan ang nangyari nu’ng 2004.